ديوان الشاعر الأستاذ // عمير بن عويمر اللحياني

[ابو يزيد]

http://up3.m5zn.com/File/8-2008/yx74trw4l9n.gif

السلام عليكم ورحمة الله وبركاته
.
.
لي الفخر إني أكتب الديوان الكامل للشاعر والمثقف والأديب أ/عمير بن عويمر اللحياني
.
http://up3.m5zn.com/File/8-2008/yx74trw4l9n.gif
.
بسم الله نبدأ بأول قصائده حفظه الله لنا
.
.
1
ضعيف النفس

ضعيف النفس يا اهل الْعِرْف عند الناس والسِّفْلَهْ=تراه اللي يِعَذْرِبْ في رفيقه عند جُلاَّسَهْ


يقول إفلان فيـهْ وقام مـن عنـده يولِّفْ لَهْ=خسيس ومثل هذا جِعْل ربي يُكْتم أنفاسهْ


ولو في زيلتـه رجَّال ما يســوى ولا تَفْـلَهْ=خبـيث الطبع من مثله لك الله مَيِّت احساسهْ


ضعيف النفس عند الناس خسخس بَهْ وسنسف لَهْ=وشَرِّبْه الذي قد شَرَّبه للناس من كاسهْ


عسى مثلـه قليـل ولا يجي في رِبْعِتِي مِثْلَـهْ=ضـعيف النفس هذا مَعْدنـه خربان من ساسهْ


ترى مِنْهُ تِصَــيَّدْ غِرَّةْ المخلوق في غَفْـلَهْ=بلاه الله بلوى وانقلب باسـه على راسهْ

-
.
-
2
قصيدة شروط الشعر
إذا كنت تملك موهبة الشعر ولديك رغبة في النظم الموزون فاقرأ القصيدة التالية وطبَّق ما فيها من شروط وإرشادات فبإذن الله سيتحقق لك ما تريد .



يا للي تَهَمْزَا الشِّعِر حَذْرَا تَهَمْزَاهْ=ما كل ما جمَّعْت يصبح قصيده


الشِّعْر مِنْحَهْ من إلهٍ عبدناه=ثُمْ نُصْقُلَهْ بالإطـلاع ونزيده


اللي يبا مِنَّا نصيحه نصحناه=واللي يبا مِنَّا إفاده نفيده


أساس بيت الشِّعْر كلمهْ مغنَّاه=أقول هذا من تجاربْ عديده


إنْ كان شِعْرك قصدك الناس تقراه=أختار لَهْ معنى وفكرهْ جديده


ثُمْ اُكْتُبَهْ واكِّدْ على طِيْب معناه=وَاقْراه مرَّاتٍ كثير وعديده


ثُمْ نَقِّحْ اللي ما تريده وتَبْغاه=حتى تصير أبيات شِعْرك فريده


لَحِّنْ وغَنِّي كل بيتٍ على إحْدَاه=لا تكتفي بواحدْ تصلْ ما تريده


والقافيه شَرْطٍ حذارا تعدَّاه =عشان بيت الشِعْر تقدرْ تصيده


الشِّعْر مثل الصيد يا صعب مرماه=ويا مَسْهَلَهْ والله على من يجيده


أصْدَقْ شِعِرْ فالشِّعْر شِعْر المعاناه=هذا كلامي وانشره فالجريده

-
.
-
3
جربت انا الدنيا

الله من قلبٍ سرى فيه وِلْوَالْ= سهران ليله ما تهنَّا بمنامه


من شوف ناسٍ ما تنشِّطْ لي البال=لا دين فيها ولا لديها استقامه


ناسِ تبيع وتشري السِّم بالمال= والكل منهم مجتهد في الْتِهَامه


أجسامهم لا شفتها كنَّها حَبَال=كلٌ على وجهه تخيِّمْ عسامه


وأشوف ناسٍ طبعها القيل والقال=يسعون بين الناس بالإنقسامه


أنذال لن عاشوا ولن ماتوا أنذال=من مثلهم ما فيه ذرَّة شهامه


جرَّبت أنا الدنيا وشاهدت الأهوال=منها يشيب الطفل قبل انفطامه


الناس فالدنيا على عدَّة اشكال=رجلٍ كريم ، ورَجَلْ راعي شهامه


ورَجَلٍ خسيس ، ورَجَلْ فالح ، ورَجَّالْ=نذلٍ ، ورَجْلٍ ما يورِّد سهامه


رَجَّالْ يسوى لَهْ ثمانين رَجَّال=الجود طبعه والشهامه وِسَامَه


لا ثِقل حِمْلَكْ جاك للحِمْل يشتال=عوِنْ قال عندي صدِّقه في كلامه


ورَجَّال ما يُشْرَى ولو كان بِرْيال=ما فيه سَرَّهْ يا عساه العدامه


لا تِحْتِزِم بالنذل لو قال ما قال=لا تِحْتِزِم بَهْ ينقطع بَكْ حِزَامه


أهل المثل من قبل قالوا فالأمثال=النذل نذل ولو تَمَرْجَلْ هِلامَه


يالله تهدينا على زين الأعمال=ومن فعل بعض الناس نرجوا السلامه

-
.
-
4
يامرحبا يامير
مناسبة القصيدة : نَظَمْتُ هذه القصيدة بمناسبة قيام خادم الحرمين الشريفين - الملك عبد الله بن عبد العزيز حفظه الله - بزيارته التفقدية لمكة المكرمة ( وكان وقتها ولياً للعهد ) وتشريفه حفل أهالي مكة المكرمة حاضرةً وباديةً ، وقد نُشِرَتْ حينها في جريدة المدينة



يا مرحبا بَكْ عِدْ هَمَّال الامطارْ=وِعْداد من فالحج لِبْس الْحِرَامي


يا مرحبا يا مير يا نَسْل الاحرارْ=يا مرحبا بَكْ يا رفيع المَقَامي


ويامرحبا بسلطان سلطان الاخْيَارْ=حَلَّالْ كُل المعضلات الْجِسَامي


لَهْ فَالْبَحَرْ غَوَّاصْ وفا لجو طَيَّارْ=وللمملكه وِحْدودها دومْ حَامي


أُم القُرى تهديكم اليوم الازْهَارْ=أزهار وَرْد وياسمين وخُزَامي


وتهديكم الزَّمْزَمْ وتهديكم أشعارْ=وتهدِيكم التَّقْدير والإِحْتِرَامي


انتم وَابُو فيصل لنا تاجْ وِشْعَارْ=نَفْخَرْ بكم يال السُّعود الْكِرَامي


انتم ذَرَانَا عِزَّنا يا هَلَ الْكَارْ =لا جا نَهارٍ فيهْ شَد الْحِزَامي


وانتم هَلَ الطَّالاتْ في كُلْ مِضْمَارْ=مِنْهُ زبنْ لِدْيَاركم ما يِضَامي


يا هْلَ الْكَرَمْ والجودْ للضَّيفْ و الْجَارْ= يا جِعْل عَوْدٍ جابكُمْ للرِّحَامي


عَطَاكُم الْيومَهْ وَصَلْ كُل الاقطارْ=شَرْقٍ وغَربْ وفي جنُوبٍ وشَامي


أمَّنْتُوا الْخَايِفْ وطَفَّيْتُوا الثَّارْ= والشَّرْع طُبِّقْ بالوفا والتَّمَامي


والْجَهْل راحْ وبيننا صارْ تِذْكَارْ=من يومكُمْ حِفْتُوهْ ما عَاد قَامي


والْعِلْم عَمْ وصارْ لِكْبَارْ وِصْغَارْ=من يوم اخُوكْ الْفَهْد لِزْم الْخِطَامي


بالتَّحْلِيَهْ يا مِير صَارْ الْبَحَرْ صَارْ=حلو المذاق ومِنْه تَرْوَى الظَّوَامي


مَكَّهْ وِطَيْبَهْ عَمَّها اليوم الِإعْمَارْ=وامَّا المشاعِرْ طُوِّرَتْ بالْخِيَامي


ضِدْ الحريقْ ولا تُوَلٍّعْ بها النَّارْ=وِمْنَظَّمَهْ وِمْكَيَّفَهْ يا سَلامي


وَانْفَاقْ فالظُّلْعَانْ زَانَتْ بالانْوَارْ=يمشي بها كُل الحجيج بنظَامي


حِنَّا بني لِحْيَانْ لا جات الاخْطَارْ= نِفْدِى وطَنَّا ما نهاب الْعَدَامي


ارواحَنَا من دُونكُمْ مالها اسْعَارْ=حِنَّا فِدَاكُمْ شيخَنَا والغلامي


يا جِعْلُكُمْ تَبْقون وتطُولْ الاعْمَارْ=ويا جِعْلُكمْ تَبْقون مَلْيون عَامي-
.
-
5
قالوا تغزل



قالوا تغزَّل قلت أنا أحب بالحيل=حبٍ عفيف وحب شيءٍ مباحي


أحب أنا بالحيل صُفر المعاميل=وأحب ريح الهيل لا من فاحي


وأحب صَفرا تنسكب فالفناجيل= وياما حلا نجرٍ يلجْ الصياحي


وأحب أنا من الناس ذبَّاحة الْحِيل=أهل الكرم والجود وأهل النصاحي


وأحب أنا المسيار بَرْضٍ بها سيل=وأحب أنا من الزهر زهر الأقاحي


وأحب أنا ركَّابة الهجن والخيل=وأحب فرسان ٍ تهز الرماحي


وأحب أنا المجلاس عند الرياجيل=أهل السوالف والعلوم الملاحي


ويَّاهم أسهر واتعلل تعاليل=حتى ولو طال السَّهر للصباحي


ما مَلْ جلستهم نهارٍ ولا ليل=ولاشك ما لي في سواهم صلاحي


ولا أحب أنا الثرثار بالحيل بالحيل=ولا أحب رجَّالٍ كثير اللحاحي


ولا حب أنا نقَّالة القال والقيل=ولا أحب ناسٍ ينكشون الجراحي


ولا أحب أنا من حبني حب تمثيل=حب الغشش لاشك سمٍ ذحاحي


ولا أحب أنا المسيار يم المهابيل=حتى ولو قُلِّدت منهم وشاحي

-
.
-
6
بيت الكرم

يا جعل بيتٍ ما يكَرِّم ضيوفه=تنهد سيسانه وينهد مَبْنَاهْ


ترى البخيل الناس ما تحب شوفه=ولا تحب مجلاسه ولا تحب طِرْيَاهْ


لا شاف ضيفٍ يندرق سَدْ طوفه=وان دق بابه قال ماني هِنَيَّاهْ


وللعز يا بيت الكَرَم والمضوفه=اللي يحب الضيف ويحب مَلْفَاهْ


تلقى الكريم الشهم باسط كفوفه=بالجود ما يبخل على كل من جَاهْ


لاجاه ضيفه قام يذبح خروفه=ويكَثِّر الترحيب وهذي سِجَايَاهْ


عن الكرامه ما ترده ظروفه=ويا كثر ما تبذل من الخير يِمْنَاهْ


وياشين رَجْلٍ ما يتفقد ضعوفه=ويساعد المحتاج باللي يتورَّاهْ


اللي على الأقراب ما فيه روفه=إبعد عنه وَاحْذر تسوِّي سِوَايَاهْ


رَجْلٍ كما هذا وهذي وصوفه=ما فيه سَرهْ يا عسى النار مَثْوَاهْ


ويا خِس رَجَّالٍ قليله عروفه=إلْيَا نصحته قام وَاعْطاك عِلْبَاهْ


والاَّ رخى راسه وهزهز كتوفه=وصمم على رايه ولَقَّاك مَقْفَاهْ


اللي سواته ما عليهم حسوفه=لا خير فيه ولا في مثله وشَروَاهْ

-
.
-
7
ياما حلا المرباع


يا ما حَلا الْمِرْبَاع فالبَّر لا كان=في ديرةٍ ربِّي بِوَبْلَه غَسَلْهَا


والأرض خضرا كنَّها نَبْت بستان=سبحان محييها ومنبِت أثَلْهَا


ماها قراح ودوم للصيد مسكان=أرض الوناسه حظ منه نِزَلْهَا


نِسْتَر بالمرباع فيها على شان=نبعد عن هموم الحياه ومَلَلْهَا


ومعنا بهار وبن ودلال رسلان= فنجالها احلى من أطايب عَسَلْهَا


ومعنا صقور احرار وصقور شيهان=ومعنا سلوقيٍّ يسابق عَجَلْهَا


لا شاف الارنب ينطلق مثل سرحان=ويعود بالصيده وهو ما قَتَلْهَا


أرض عذيَّة زان فيها السَّمَر زان=بين الرجال اللي ينشِّط قَبَلْهَا


هذا يشب النار بالصيد فرحان=وهذا يُرز النوز باعلى جبَلْهَا


ولا نرمي الاّ بواحده شرط ورهان=وِلْيَا طرحناها رَكَزْنَا بَدَلْهَا


والكل يضحك ما به احقاد واضغانْ=واهل الجهاله ما نعاين جَهَلْهَا

-
.
-
8
قصيدة في حب الأم


لا تَلْمْنِي في هواها إنَّني=مُغْرَمٌ في حُبِّهَا ومُتَيَّمُ


فَهْيَ رُوحِي ساكنَهْ بين اضْلُعِي=وَهْيَ أنسامِي التي اتنسمُ


دوحةٌ يُضفي عليَّ ظلالها=عِشْتُ بين اغصانِها أترنمُ


تسهرُ الليلَ الطويلَ لراحتي=إنْ أصبتُ بعارضٍ تتألمُ


عشت يا أمَّاه عشتِ دائماً=أنتِ أجملُ من عرفتُ وأعظمُ


كم تألمت لضر مسني=كم تألمتِ و انا لا اعلمُ


فبكِ تحلو الحياةُ وتجملُ=وبدونكِ كل شيءٍ علقمُ

-
.
-
9
ياحب

يا حُبُّ أَنْت سُرُورِي=أَمْ فَرحَتِي وَاشتِيَاقِي


أَمْ أَنْتَ كنْتَ عَذَابِي=أَمْ لَوعَتِي وَاحْتِرَاقِي


أَمْ أنتَ لِيَّ نَعيْمٌ=أَمْ أنْتَ سِرُّ الْفِرَاقِ


عُذِّبتُ فِيكَ كَثِيرَاً=حُمِّلتُ مَا لا يُطَاقِ


فيكَ الدُّمُوعُ تَهُونُ=عِند اللقَا وَالْعِنَاقِ


يَا حُبُّ أنتَ شُعُورِي=بَل أنْت َ سِرُّ انطِلاقِي


يَا حُبُّ أنْتَ جَمِيلٌ=حُلْوٌ وَمُرُّ المذاقِ


أنت الحياة بحقٍ=لولاك ما كنتُ باقي

-
.
-
10
جربت دهري

جربت دهري ففادتني تجاربه=وادركت أن المعالي دربها وعرُ


فالمجد كالبحر يحوي الدر باطنه=وباطن المجد فيه العزُّ والفخْرُ


يا طالب المجد اعمل دونما سأمٍ=فكل ليلٍ سيأتي بعده فجْرُ


وخُذْ بأسبابِ مجدٍ أنت تطلبه=واقدم بعزمٍ إذا ما همك الأمرُ


من يمتطي ظهرَ بحر المجد مصطحباً=طوق النجاةِ فلن ينتابه الذعرُ


ومن يغامر فيما ليس يعرفه=يحلو له الدهر أو لا يحلو الدهرُ


فكم مغامر جاب البحر زورقه=وكم مغامر لم يذعن له البحرُ


وكم طموحٍ بعلمٍ نالَ مطلبه=وكم عجولٍ بجهلٍ ماله ذِكرُ
تابع

[ابو يزيد]

رجعنا للديوان
http://up3.m5zn.com/File/8-2008/yx74trw4l9n.gif

-
.
-
11
حنا نبي خوتك

قالوا تسافر غيِّر الجو يا فلان=متعه ونزهه ما تَعَوَّض بَدَلْها


نبغى السَّفَر للشام والاَّ للبنان=يا زينها والله ويا زين أَهَلْها


نبغى نشوف آثارها عَبر الازمان=ونسكن مصايفها ونسكن فِلَلْها


وان قلت تم اليوم ما انته بندمان=حنَّا نبا خُوَّتك قلْ تَم قُلها


قلت امهلوني يوم أفكر على شان=أخشى على نفسي يعوِّد جَهَلها


فكرت وانِّي كان وافقت غلطان=اترك بلادٍ ما تعدَّد خِصَلها


تمتاز بالخيرات عن كل الاوطان=والعتم يكسو سهلها مع جِبَلها


فيها المصايف مثل شهبه ورغدان=والسودة اللي يبتهج من نَزَلها


وفيها الشفا وسهولٍ أخرى ووديان=تلبس لنا فالصيف أجمل حِلَلها


والطايف المأنوس كل عام يزدان=أرضه بِوَبل الغيث ربِّي غَسَلها


جَوَّه لطيف وفيه خوخٍ ورمَّان=يجلو عن النفس العليله عِلَلها


ماني بساليها ولو كان ما كان=أرض الجزيره ما نلاقي مَثَلها


مير اعذروني سافروا بحفظ رحمان= ما ودِّي أخلط وَردَهَا مع بَصَلها

-
.
-
12
عصامي

عِصَامِيُّ أَبْنِي النَّفْسَ بِالنَّفْسِ دَائِمَاً=عَزِيزٌ وَلا يُوطَأْ مِن النَّاسِ جَانِبِي


أَبِيٌّ وَلا أَرْضَى بِظُلْمٍ يَمَسُّنِي=وَإِنْ كَانَ هَذَا الظُّلْم ظُلْمُ الأَقَارِبِ


أ َجُودُ بِمَالِي للضَّعِيفِ مُوَاسِيَاً= بِلا مِنَّةٍ فَالْمَال آتٍ وَذَاهِبِ


وَمَا قُلْتُ ذَا تِيهَاً بِنُبْلِ شَمَائِلِي=وَلَكِنَّنِي أَفْخَرْ بِحُسْنِ الْمَنَاقِبِ

-
.
-
13
أرض الكنانة

أرض الكنانة أنت العلم منبعه=فالكل من نبعكِ المعطاء يغترفُ


يا مصر أنت لنا أمٌ نبجلها=إذا رأيناك تقديراً لك نقفُ


كم من شبابٍ بذلتي في تعلُّمِنَا=كم جهودٍ بذلتيها لنأتلفُ


لا ينكر الحر معروفاً لباذله=فنحن يا مصر بالمعروف نعترفُ


هذي بلادي أتتك اليوم رافعةٌ=رأس الفخار ويحمل عرشها الشرفُ


بالأمس صحراء لا ماء ولا شجر=والبيت من شعر منه الناس تلتحفُ


واليوم كالروضة الغناء مزهرة=والكل من زهرها الفواح يقتطفُ


هذي بلادي في الماضي وحاضرها= فرق كبير فذا عن ذاك يختلفُ

-
.
-
14
من شافك وصد

يا محقر الرَّجَّال لا شافك وصَدْ=وقام يتلفت لليمين ويسارهْ


وراح يتشاغل عنْك ويصعِّر الخَدْ=ويضن فعله من صفات الشطارهْ


خلَّه يروح وجعْله اليوم ما رَدْ=زِلَّهْ وخلَّهْ مال مثْله وقارهْ


واللي ليا شافك بشوفتك يسعَدْ=إقبلْ عليه وواصله بالزيارهْ


عساه ما يشقى ولا يوم يِنضَدْ=قلبه نظيف ولا يحب الحقارهْ


والله يجازي راعي القلب الاسوًدْ=اللي على الأجواد تشتب نارهْ


نفسه شحيحه ماله افعال تُحْمَدْ=ولا عمره أرسل طُعْمِةٍ يَمْ جارهْ


لا جاه من يبغى المعونه تنهَّدْ=وقام يتعذَّرْ ما يحب الخسارهْ


وتلقاه عند الناس يرعد ويزبِدْ=بالكذب والاَّ ما في راسه نعارهْ


كُلٍّ عرف طبْعهْ وكُلٍ تأكَّدْ=ومن يفعل افعاله خساره خسارهْ


هذا كلام الصدق والله يشهَدْ=والناس تعرف مقصدي بالإشارهْ

-
.
-
15
اليوم الوطني

يوم الوطن يوم اتحاد الجزيره=يوم اتحد شرقٍ وغربْ وشمالي


صار الجنوب اليوم يا كثر خيره=بعد التوحد زاد فيه الجمالي


يا رب ترحم من بدا بالمسيره=عبد العزيز اللي رقى للمعالي


للدين يدعو باجتهاد وبصيره=يدعو بصدق ولا يحب الخمالي


مقدام ما يخشى الأمور العسيره=صادق صدوق القول لا قال قالي


بالشرع يحكم بين كل العشيره=العدل طبعه ما يحب الميالي


شهم كريم فيه عزه وغيره=من يستجيره قام دونه وحالي


لم العرب من كل صوب وديره=اخوان صاروا بعد غزو وقتالي


بعد التشتت والحياه المريره=اليوم كل الناس في خير حالي


وسعود جا بعده وكمل مسيره=قاد المعارك في سهول وجبالي


يعطي العطايا ما يشاور وزيره=كريم سبلى بيننا دوم غالي


وجا بعده الفيصل نظيف السريره=فيصل ابو خالد كريم السبالي


لا قام فيصل في الأمور الخطيره=قول وفعل ولا يهاب النزالي


يا كم خايف في حياته يجيره=فيصل شجاع وشهرته لا تزالي


وجتنا السعاده والحياة الوثيره=في عهد خالد مال خالد مثالي


شهم وكريم وسيرته خوش سيره=أبو الضعوف وفيه كل اعتدالي


واليوم عهد الفهد ما في نظيره=عهد الرخا والعلم عهد الكمالي


قاد البلاد بحكمته والبصيره= نحو التقدم ما يعرف المحالي


عمر بيوت الله وامن قطيره=يبذل ويعطي كل حالي وغالي


فيه الحصافه والسياسه غزيره=فيه الشجاعه فيه زين الخصالي


فهد حكيم الراي ما احد يثيره=يدار الأمور وخلدته الفعالي


أمن حدود المملكه بالذخيره=الله يجيره من صروف الليالي


العلم في عهده وصل كل ديره=والجهل ماله في وطنا مجالي


يا الله ياللي ما سجدنا لغيره=تحفظ لنا آل سعود يا ذا الجلالي

-
.
-
16
تاريخ قبيلة لحيان

هلا يا مرحبا بزوَّارنا من معظم البُلْدان=من ارض الشرق وارض الغرب قاصيها ودانيها


نرحب بالجميع اليوم في موقع بني لحيان=ومن لحيان باقة ورد للزوَّار نهديها


لنا بين القبايل منتدى ويديره الشُّبان=شباب المنتدى يالله من الحساد تحميها


ترانا يد وحْدَه فاللزوم وكلنا إخوان=ومع كل القبايل ناخذ الزينه ونعطيها


وحِنَّا يا بني لحيان دايم نفخر بلحيان=ثلاث قرون حكَّام العلا واللي حواليها


لنا في صفحة التاريخ مجد مثبَّت الأركان=لنا خط و كتابة صادق التاريخ يرويها


لنا تاريخ ثابت بالدليل وقوة البرهان= مسجَّل فالمراجع من بحث عنها يلاقيها


لنا تاريخ شامخ في قديم الوقت والأزمان=حضاره في العلا وآثارنا تملا نواحيها


لنا ملوك ولنا مُلْك ولنا عِز ولنا سلطان=ولنا في ماضي التاريخ دوله نفتخر فيها


ترى من حقنا نفخر بماضينا مع العربان=ومن حق القبايل مثلنا تفخر بماضيها


بني لحيان حِنَّا ننتمي لهذيل والهذلان=هذيل أهل الفصاحه فأوَّل الدنيا وتاليها


وحنا اليوم فالعهد السعودي نحمد الرحمن=نعيش فنعمة مَقْدَرْ أعَدِّدْهَا ولا احصيها


مدى التاريخ تبقى دولة التوحيد والقرآن=نصادق من يصادقها ونكره من يعاديها


هَلَا العوجا حماة الدين دايم للعرب مزبان=يعيش " الكنق " عبد الله ويرحم عَود بانيها

-
.
-
17
ياللي غشيم أنصحك

ياللي غشيم أنصحك عن بعض الاجناس=أسمع كلامي كان تبغى الحقيقه


أصحى تصاحب ناس نذلين وخساس=واحذر تماشي مثلهم لو دقيقه


من صحبته شينه ولا ترفع الراس=قطع علاقاتك معه لو وثيقه


الصاحب اللي شين يا سرع مانحاس=ينكرك لو يلقاك يوم إبطريقه


اللي كماه بغير ساس ومغراس=لفيقه حَذْرَا تصاحب لفيقه


الصحبه اللي ما تعزز على ساس=ما تسقي الظامي ولا تبل ريقه


وابعد عن النمام في كل مجلاس=اللي بنقل الحكي شب الحريقه


بين القرابه يشعل النار درباس=ملعون والله لا يسهل طريقه


كل الخساسه فيه معدوم الاحساس=ماظنتي من الناس واحد يطيقه


بعض العرب يعجبك بلباس ولباس=لكن حَذْرَا لا يغرك بريقه


إنته ولد مدهال من خيرة الناس=يا كم واحد معسر فك ضيقه


شهم وكريم فيه نخوه ونوماس=بالطيبه دايم يبدي رفيقه


مثل الذهب ما خالطه صفر =صخي نخي لاجاه من يستفيقه


حلا باس مشيك مع رياجيل لا باس=أكسب رجال في نسبها عريقه


وخلك صدوق وهرجك اليوم بقياس=حولك ترى الدنيا بحور عميقه


وخلك لقول الحق قدوه ونبراس=دايم ماش شي يعيقه


من عاشر الأنذال بالرجل ينداس=ومن عاشر الأجواد ما حس ضيقه

-
.
-
17
أهل المصالح

يا مكثر الأصحاب في حزة اللين=قت الخا كُلٍّ يقولك صحيبك


ما عاد تعرف منهو الزين والشين=اهل المصالح كلهم في طريقك


لكنْ جرِّبهم ولا بد ما يبين=لصاحب اللي لا نتخيته يجيبك


أهل المصالح ما يفيدون يا حسين=صيبهم ما سدّهم عن نصيبك


أحذر تصاحبهم تراهم مولِّين=ماهمهم غير الذي وسط جيبك


لا اقفى زمانك راح الاصحاب مقفين=ا فيهم اللي فالشدايد يثيبك

-
.
-
18
هات القدوع

يا خالد اربع قوم رحِّب بالاجواد = رحِّب بهم يا بوك ترحيب وافي


وهات القدوع لكل ضيفٍ ورَوَّاد= وسَوْ الدلال ببنْ وبهيل صافي


واذبح لنا العاقر وولِّمْ لنا الزاد=اللي شحمها فالصواني يشافي


وارسل لخيلانك ولا تنسى الاجداد =وناد الجماعه عندنا ضيف لا في


وخلَّكْ لمن ينصاك مصدر وميراد =إعط الذي تقدر وخلك سنافي


ترى الشحيح وراعي البخل ما فاد=مافاد ربعه في السنين العجافي


إعطي بطيبة نفس والخير يزداد=ترى لشكاله ما تجي بالعوافي


لا عاد من يبخل على الضيف لا عاد=لا عاد من لا يعتني بالضعافي


واحذر ورى نفسك تهوَّر وتنقاد=احذر يجي يالورع فيك اختلافي


فالناس من يغبطك وفالناس حسَّاد=الله عليم بكل ما كان خافي


ولا تتبع الغِرَّات من صاد ينصاد=من عامل الله ما يجيه الخلافي

-
.
-
19
تأمل

رأيتك يوماً على الرابيهْ =تفكر في خلق هذا البشرْ


تسائل نفسك كيف خلقتَ =وكيف السحاب نشى وانتشرْ


فسبحان ربي العظيم الذي=له الكون هذا بشتَّى الصورْ


تعالى إلهك رب السماءٍ =ومنشي السحاب ومجري البحرْ


جميع الخلائق تسبح له =من الإنس والجن حتى الشجر

-
.
-
20
رائد الفضاء المسلم

زَار الْفَضَا سُلْطَانُ وَهُوَ مُشَمِّرٌ =عَنْ سَاعِدَيْهِ لِكَيْ يَقُولُ إلَى الْوَرَا


هَا قَدْ صَعَدْتُ إلَى الْفَضَاءِ مُمَثِّلاً =عَنْ أُمَّةِ الإسْلامِ إنِّي الأقْدَرَا


فَاثْبَتُّ أَنَّا قَادِرُونَ عَلَى الَّذِي=قَدرُوا عَلَيهِ الآخَرُونَ وَ أكْثَرَا


فَصْلُ السَّوَائِلِ كَانَ جُلَّ مُهِمَّتِي = وَ تَجَارِبٌ أُخْرَى تَعُجُّ وَتَكْثُرَا


فَا جْرَيْتُ كُلَّ تَجَارِبِي بِمَهَارَةٍ=حَتَّى نَجَحْتُ بِهَا نَجَاحَاً مُبْهِرَا


شَهِدُوا لَنَا الأَعْدَاءُ رَغْمَ أُنُوفِهِمْ =مِمَّا رَأَوْهُ فَقَدْ رَأَوْا مَا يُبْهِرَا


إِنَّ الْحَضَارَةَ مِنْ بِنَاءِ جُدُودُنَا =فَلِذَا بَهَا نَحْنُ أَحَقُّ وَ أَجْدَرَا


لا تعجبوا مما أقول لأنه = حقٌ فقد سدنا العوالم أدهرا


و الغرب عائش آنذاك بجهله =حتى تراه من الجهالة أغبرا


هذي هي الدنيا تجود و تمنع =يوم لهم و لنا نهارٌ آخرا


فلسوف يأتي في المحافلِ دورنا =فنصير ننهى مَنْ نريد ونأمرا


هيا بنو الإسلام هبوا و أنهضوا=لن نرتضي أبداً بما دون الذرا

-
.
-
21
أين الصداقه

عَجَبٌ عَجِيبٌ مَا أراهُ=أيْنَ الصَّدَاقَةُ والصَّدِيقُ


أينَ التَّكَاتُفُ والتَّآزُر=أين الرَّفَاقَةُ والرَّفِيقُ


كُلٌ يَسِيرُ عَلَى هَوَاه=وَيَقُول أَنَا حُرٌّ طَلِيقُ


كُلٌّ يَقُول لِيَ ارتِبَاطٌ = مَشْغُول في الدُّنيَا غَرِيقُ


قَلَّ التَّرَابُطُ بَين قَوْمِي=وَتَفَكَّكَ الشَّعبُ العَرِيقُ


عِفتُ الحَيَاة وَمَا عَلَيهَا=وَاصبَحتُ مِن هَذَا أَضِيقُ

وبكذا انتهينا من الديوان
http://up3.m5zn.com/File/8-2008/yx74trw4l9n.gif

[أبو رواد]

ديوان جميل جداً لشخص أحببناه جميعاً ,,,شخص نفتخر به دائماً

شخص هو بلسم لكل جراحنا ,,,حفظك الله يا ابا طارق


وشكراً لك ياخوي ابو يزيد لنقلك المميز,,,

[ابو يزيد]

ديوان جميل جداً لشخص أحببناه جميعاً ,,,شخص نفتخر به دائماً

شخص هو بلسم لكل جراحنا ,,,حفظك الله يا ابا طارق


وشكراً لك ياخوي ابو يزيد لنقلك المميز,,,

والله يستاهل ابو عويمر ماقصرت اخوي عماد , دائما سباق للخير الموضوع حاطه بعد العصر رديت انتا
بعد العشاء مافي متواجدين ,, شكرا اكررها عماد

[عبدالعزيز اللحياني]

ماشاء الله تبارك الله .

الله يعطيك العافية أبا يزيد , جهودك الجبارة واضحة أسأل الله ألا يحرمك أجرها .

شدتني قصيدة العصامي , وتأملتها كثيراً . وكذا قصيدة في حب الأم و قصيدة أرض الكنانة وقصيدة من شافك وصد وغيرها الكثير .


بصراحة تمتع و أنا أتنقل من قصيدة إلى أخرى , وكلما ظننت أن القصيدة التي أقرأها أفضل الديوان أجد ما بعدها أفضل .

[ابو يزيد]

ماشاء الله تبارك الله .

الله يعطيك العافية أبا يزيد , جهودك الجبارة واضحة أسأل الله ألا يحرمك أجرها .

شدتني قصيدة العصامي , وتأملتها كثيراً . وكذا قصيدة في حب الأم و قصيدة أرض الكنانة وقصيدة من شافك وصد وغيرها الكثير .


بصراحة تمتع و أنا أتنقل من قصيدة إلى أخرى , وكلما ظننت أن القصيدة التي أقرأها أفضل الديوان أجد ما بعدها أفضل .









أنتم هل الإبداع ياعبد العزيز, ولاانسي تقدير الشاعر المقصود