ابو نايف
06-10-2008, 12:35 PM
قصة عبد الحليم والبلى علوي
--------------------------------------------------------------------------------
اليل كله نحفر فى الواطة قدام بيت ناس حاج ازرق ..... وندق فى الخيمة .... الله يرحمه حاج ازرق كان راجل طيب ...لحق امات طه .....بتذكر قعدته قدام دكان عبد المجيد فى كرسيه اب تلاتة رجول .....والرجل الرابعة قصيرة ساندا بى حجر .. والجاى والغادى يسلم عليه .. يهاظر مع دا .... ويسالم على دا ... دا حال الدنيا .... دنيا فانية ما بتدوم لى زول ...غايتو اليل داك لمن الكواريك ضربت فى بيت ناس حاج ازرق ... وقالو حاج ازرق مات ... الحله دى كلها اتلمت ... واها نحن الاولاد السغار قالو لينا امشو جيبو الصيوان من الجامع ... ودقوهو قدام البيت ... وطبعا بعد محاورات ومداورات هندسية وتنظير من رجال الحلة الكبار .. دقينا الصيوان ... والواحد ا يدو بقبقت من الحفير بالعتله ... المهم تانى يوم الصباح لمان الخبر انتشر ... طبعا جات وفود المعزيين ... وصوانى الجيران دى تتطاقش بالفطور والغدا ...والله عاداتنا دى سمحة خلاس ...عيلا الما سمح جاييكم ... تشوف الناس دى متكلة يومين وتلاتة ... وسيد البكا يدين من جاى وجاى ... عشان ما يشيلو حسو ... وانا طبعا حايم وسط الكتل البشرية دى بوزع فى الشاى والموية واسمع ليك ديل بتناقشو نقاش حاد فى قصة الهلال الغلب المريخ والشكله مدورة .... بى هناك جماعة قاعدين يشتمو فى الحيكومة ...وبى غادى واحد بيحكى فى حكاية شكلتو مع الكمسارى الاداهو خمسمية جنيه مقطعة والخيمة دى من شدة الزحمة التقول حلة بلية بتغلى فى النار بعد شوية لمحت ليك راجل بسيط جاى من بعيد رجلينه مغبرات ...هى دا ما عمك حسن جاى من الشغل ... مسكين عمك حسن ... حنيت عليهو من تلتلة المواصلات ...اصلو جاى من الخرتوم ....شغال موظف فى الادارة المركزية حقة الكهرباء .... واقترب عمك حسن ما جا باب الخيمه ورفع يدينو قال الفاتحة مافى زووول اشتغل بيه الشغلة .....بعد شويه واحد قاعد فى الركن لكز ليك سيد العزا وقال ليه شوف عمك داك رافع يدينو ... قام الراجل بكل تثاقل وتافف رفع يدينه نص رفعة كدى وشال الفاتحة مع عمك حسن ... وانا قمت جارى للراجل بى كباية الشاى ... قلت الحقو ...قبل ما يلحق امات طه ... حالتو تحنن ... جاى من مشوار بعيد ... واثناء ما انا شايل صينيتى ...اذا بعربه فارهة تقيف فى باب الخيمه وتغبر الناس الجالسين ... هيع ... ليلى علوى .. جديدة كرت ..ناس الخيمه ديل جت دارت رؤسهم زى مروحة الطربيزة .....تنظر الى ذلك القادم من عالم الرفاهية...وفجاة يفتح باب العربية وينزل منها زول ما بغباهو ...لاحول ولا قوة الا بالله ...دا ما عبد الرحيم الممعوط؟ اى والله ياهو زاتو بى شحمه ولحمة ...لابس ليه جلابية لون العربية رمادى داكن وخاتى طاقية مذركشه فوق راسو ...التقول ماشى بيت عرس ...سى يا عبد الرحيم ... بعد ما كنت حايم سكران وتفرتق فى الحفلات ... بقيت زول ... وراكب ليلى علوى ... والله تجارة العملة نفعتك تب...المهم خلينا ما نقطع فى عبد الرحيم الممعوط ... المصيبة فى خيمة البكا الوقفت عن بكرة ابيها تشيل الفاتحة مع عبد الرحيم الممعوط وتستقبله استقبال الابطال الفاتحين ..المهم لمن جا عبد الرحيم يقعد مافى حتة ليهو شفت جارنا جلال لكز عمك حسن وقال ليه بكل اذدراء فج شوية يا حاج خلى الضيف يقعد ... قعدت فوقك حيطة يا عبد الرحيم .. وانا لمن شفت المنظر دا دموعى جرت شررررر
سبحان مغير الاحوال من حال الى حال الناس تقوم عمك حسن ... الراجل السكرة العلم عيالو كلهم فى الجامعات ...عشان يقعد عبد الرحيم الممعوط ..السكران ... الحيران ....وانا من زعلتى ابيت اودى ليه الشاى لغاية ما نهرونى عشان اودى الشاى لى عبد الرحيم ....وانا من غيظتى .... شلت كباية الشاى وجريت بيها لى ليلى علوى وكشحتها فى قزاز العربية ...وقمت جارى ... والناس تسب وتلعن فينى .. وعبد الرحيم الممعوط بى كل سماحة يقول ليهم ..يا خوانا سيبوهو الولد لسه سغير وجاهل ..واكان للعربية ما مشكلة بوديها للغسيل الالى .... وانا جارى وبلعن فى الممعوط ...وفى ليلى علوى ... و بلعن فى الزمن الخلانا بقينا كدة.
منقوول
--------------------------------------------------------------------------------
اليل كله نحفر فى الواطة قدام بيت ناس حاج ازرق ..... وندق فى الخيمة .... الله يرحمه حاج ازرق كان راجل طيب ...لحق امات طه .....بتذكر قعدته قدام دكان عبد المجيد فى كرسيه اب تلاتة رجول .....والرجل الرابعة قصيرة ساندا بى حجر .. والجاى والغادى يسلم عليه .. يهاظر مع دا .... ويسالم على دا ... دا حال الدنيا .... دنيا فانية ما بتدوم لى زول ...غايتو اليل داك لمن الكواريك ضربت فى بيت ناس حاج ازرق ... وقالو حاج ازرق مات ... الحله دى كلها اتلمت ... واها نحن الاولاد السغار قالو لينا امشو جيبو الصيوان من الجامع ... ودقوهو قدام البيت ... وطبعا بعد محاورات ومداورات هندسية وتنظير من رجال الحلة الكبار .. دقينا الصيوان ... والواحد ا يدو بقبقت من الحفير بالعتله ... المهم تانى يوم الصباح لمان الخبر انتشر ... طبعا جات وفود المعزيين ... وصوانى الجيران دى تتطاقش بالفطور والغدا ...والله عاداتنا دى سمحة خلاس ...عيلا الما سمح جاييكم ... تشوف الناس دى متكلة يومين وتلاتة ... وسيد البكا يدين من جاى وجاى ... عشان ما يشيلو حسو ... وانا طبعا حايم وسط الكتل البشرية دى بوزع فى الشاى والموية واسمع ليك ديل بتناقشو نقاش حاد فى قصة الهلال الغلب المريخ والشكله مدورة .... بى هناك جماعة قاعدين يشتمو فى الحيكومة ...وبى غادى واحد بيحكى فى حكاية شكلتو مع الكمسارى الاداهو خمسمية جنيه مقطعة والخيمة دى من شدة الزحمة التقول حلة بلية بتغلى فى النار بعد شوية لمحت ليك راجل بسيط جاى من بعيد رجلينه مغبرات ...هى دا ما عمك حسن جاى من الشغل ... مسكين عمك حسن ... حنيت عليهو من تلتلة المواصلات ...اصلو جاى من الخرتوم ....شغال موظف فى الادارة المركزية حقة الكهرباء .... واقترب عمك حسن ما جا باب الخيمه ورفع يدينو قال الفاتحة مافى زووول اشتغل بيه الشغلة .....بعد شويه واحد قاعد فى الركن لكز ليك سيد العزا وقال ليه شوف عمك داك رافع يدينو ... قام الراجل بكل تثاقل وتافف رفع يدينه نص رفعة كدى وشال الفاتحة مع عمك حسن ... وانا قمت جارى للراجل بى كباية الشاى ... قلت الحقو ...قبل ما يلحق امات طه ... حالتو تحنن ... جاى من مشوار بعيد ... واثناء ما انا شايل صينيتى ...اذا بعربه فارهة تقيف فى باب الخيمه وتغبر الناس الجالسين ... هيع ... ليلى علوى .. جديدة كرت ..ناس الخيمه ديل جت دارت رؤسهم زى مروحة الطربيزة .....تنظر الى ذلك القادم من عالم الرفاهية...وفجاة يفتح باب العربية وينزل منها زول ما بغباهو ...لاحول ولا قوة الا بالله ...دا ما عبد الرحيم الممعوط؟ اى والله ياهو زاتو بى شحمه ولحمة ...لابس ليه جلابية لون العربية رمادى داكن وخاتى طاقية مذركشه فوق راسو ...التقول ماشى بيت عرس ...سى يا عبد الرحيم ... بعد ما كنت حايم سكران وتفرتق فى الحفلات ... بقيت زول ... وراكب ليلى علوى ... والله تجارة العملة نفعتك تب...المهم خلينا ما نقطع فى عبد الرحيم الممعوط ... المصيبة فى خيمة البكا الوقفت عن بكرة ابيها تشيل الفاتحة مع عبد الرحيم الممعوط وتستقبله استقبال الابطال الفاتحين ..المهم لمن جا عبد الرحيم يقعد مافى حتة ليهو شفت جارنا جلال لكز عمك حسن وقال ليه بكل اذدراء فج شوية يا حاج خلى الضيف يقعد ... قعدت فوقك حيطة يا عبد الرحيم .. وانا لمن شفت المنظر دا دموعى جرت شررررر
سبحان مغير الاحوال من حال الى حال الناس تقوم عمك حسن ... الراجل السكرة العلم عيالو كلهم فى الجامعات ...عشان يقعد عبد الرحيم الممعوط ..السكران ... الحيران ....وانا من زعلتى ابيت اودى ليه الشاى لغاية ما نهرونى عشان اودى الشاى لى عبد الرحيم ....وانا من غيظتى .... شلت كباية الشاى وجريت بيها لى ليلى علوى وكشحتها فى قزاز العربية ...وقمت جارى ... والناس تسب وتلعن فينى .. وعبد الرحيم الممعوط بى كل سماحة يقول ليهم ..يا خوانا سيبوهو الولد لسه سغير وجاهل ..واكان للعربية ما مشكلة بوديها للغسيل الالى .... وانا جارى وبلعن فى الممعوط ...وفى ليلى علوى ... و بلعن فى الزمن الخلانا بقينا كدة.
منقوول