قصيده في الجمس

[أبوعقاب]

اليوم يابني لحيان جايب لكم قصيده في الجمس الونيت(أبو عبارتين). أنا بصراحه من عشاق هاذي السياره. أعجبتني القصيده وحبيت أنقلها لكم.

القصيده للشاعر الكبير ضيدان بن قضعان:

راكب اللي ما تجيبه وكالة بالبيد
ولا يجيبه بهبهاني ولا وضيحي قطر

ادهمٍ وسم الجميح على جنبه جديد
مهبل اللي يوم عرض يحسبنه شفر

جمس شكمانين ملقبينه بالوليد
من سرابه ما يغبط القصيبي والجبر

كاتبينٍ في ضمانه حديده ما يبيد
تمرةٍ قاري عليها حفيد ابو بكر

كن وجهه لا نطحته تشعشع صبح عيد
وان قفيته كنه السيل لا سال وحدر

وان عرضلك في مزاياه من عنق الفريد
وان ركبته تحسبنك على سطح القمر

دقته نغمة عبادي على سلم فريد
لا عزف الاول وجاوب على عاشر وتر

لا شتغل قالت شكامينه اركد ياحديد
والقزوز تقول للقاع روح يا فقر

كن في الشكمان الايمن صدى عبد المجيد
وكن في الشكمان الايسر صدى نايف صقر

والبلوف تقول للكهربه هل من مزيد
والسيور تقول للمروحه اين المفر

تحت كبوته من الفن طيران وعبيد
ما يغنون المسافه ولا طال السفر

كل اغانيهم على الدرب واصل ياعنيد
لين تلفي قصر شيخ على العليا شهر

سايقه من صلب ربعي وله باس شديد
ما يخاف البعد والليل والموت الحمر

من صناديد ال عرجاء هل العلم الوكيد
لابةٍ من جن تمشي على هيئة بشر



وتقبلوا خالص تحياتي

[ســـــ بن تركي ـــتر]

كن في الشكمان الايمن صدى عبد المجيد
وكن في الشكمان الايسر صدى نايف صقر



ضيدان بن قضعان شاعر كبير فالة المليون حتى لو انه مهو مشارك في شاعر المليون

[م/ ممدوح محمد اللحياني]

أخوي أبو عقاب
ادام الله هذه اللة وخاصة في منتدى الشعر
ننتظر مشاركاتك الدائمة وتعليقاتك

الشاعر ضيدان بن قضعان غني عن التعريف والملق بالملك
دائماً ماتكون قصائده مميزه


كن في الشكمان الايمن صدى عبد المجيد
وكن في الشكمان الايسر صدى نايف صقر

تشبيه خطير في صوت الشكمان خاصة الايسر ههههههههههههههههههههههههه
نايف صقر صوته رايح فيها هههههههههههههه

قصيده جميلة
ولكن بالنسبة لتوصيف الجمس فهناك قصيدة محمد بن الذيب أعتقد أنه تمكن من توصيفها أفضل مع حفظ المكانه الشعريه لضيدان

تقبل خالص الود والتقدير

[أبوعقاب]

شاكر لكم ستر بن تركي و ممدوح اللحياني مروركم العطر